Revelation of John 22
La vikarara la tilovo te la lalu la mahulila me la obu la mahulila tai
1Tio, goio, e angelole, eia goio vahilo leau la lalu ale la lalu la mahulila, eia maroka, eia mememe tataho mai la glas, eia sali loata te la pulolou la mulugaluga te La Tahalo Uru, mira me Latu La Sip, 2eia sali mai ele kabili te la tia la mautu e Ierusalem ale halaba. Oio te la harare la lalu, la obu oio kukusi, la obu la mahulila, eia ge tau moli la vavuala te la taio tomi, la taio isa ge polo, eia ge vua, goio la taio isa lou, vua lou, igo molia mai ele la taio ge savulusa gete lua. Eala moli la galagala la obu alele, La Uru ge abia, eia ge bebe la bulula, eia ge viliu la valalua me hatavivile te la maututula tomi ovola te la galegale tomi, eia ge vimahuli egiteu ovola. 3La paga isa ale La Tahalo Uru ge vilea eia oukati oio te la mautu alele. La pulolou la uru moli te La Tahalo Uru, mira me Latu La Sip, eia ge oio te la mautu ale, me egiteu la bilalaha tomi tetala ge lotu tavua oio vola. 4Egite ge hilo sesele la matala, la irovilala tai tetala eia ge oio te la varu giteu ele. 5La maligoma ge oukati. Egite kama ge savele la matagaga, egite kamati ge tali tavu la mata la haro veia eia ge vimatagaga egiteu, oukati, la vuhula La Tahalo Uru moli eia ge vimatagaga egiteu. Egite ge pou te la pulolou la uru vikapopo leia, la kaluvula ge ouka.E Iesus ge beu hari loua
6Tio, goio, e angelole, eia goio veiagu mago “La merera tomi alele eia sesele moli, eia koramulia veia eme ge sau tola tomia. La Tahalo Uru ale pala vahiliti egiteu la bilalaha tetala, eia bahati e angelo tetala veia eia ge vahilo legiteu la bilalaha tetala te la imamala ale igoie, la papaga tomi ale hagagaviti ge sibitala.”7Eala moli e Kraist tai veia maie “Eau, La Uru, eau ge beu hari loua! Egiteu ale sau tola la merera tomi ale omai te la buk alele, egite ge balava sesele.”
8Eala moli eau, e Ioanes, eau lolo sesele la merera tomi alele, la papaga tomi tai oilo vola, eau hilo seseleti egiteu. Ale eau loloa mai ele, eau hilo taia mai ele, eau goio boru lagu tugu te la lagule angelo ale vahilo leau ovola, eau veia ge lotu tavua mai ele. 9Eala moli eia goio magiri roboau, eia veiagu mago “Umalati! Eau la bilalaha moli, vikapopo tai le amutou me egiteu e tabarabaramu la bilalaha tomi ale pala, me egiteu tomi ale sau tola la merera ale oilo te la buk alele. Taritigi eme ge lotu tavu moli La Tahalo Uru!”
10Goio, e angelole eia goio vei louagu la merera tetala maie mago “Umala eme ge tau roborobo la merera te la buk alele, la vuhula la imamala hagagaviti ale la merera tomi alele ge puru. 11Eia koramuli molia veia egiteu ale igigo la iruru, egite ge ruru moli. Egiteu tai ale igo gegegeru egite ge pou moli te la vulovulo giteu alele. Eala moli amutou ale taritigi, amuto ge sau tola vagari la vulovulo ale taritigi, egiteu la tahalo la iruru korale, egite ge igo molia mai la masasagala tegiteu. Amutou ale maroka, taritigi amuto ge pou moli te la vulovulo mutou ale maroka. La vuhula, la imamala eia hagagaviti ale La Uru ge beu loua.”
12Eala moli la vikararala te Iesus, eia veia maie “Eau ge beu hari loua somai. Eau ge vahari la vibalavala taku, eau ge kolia soio te la valalua me hatatavivile tomi mai la vulovulo giteu lou. 13Eau la silokola me la tapasila te la papaga tomi, la papaga tomi, eau vipoua, la papaga tomi tai, eau ge vikaluvua.”
14Egiteu ale vuhi maroka la lavalava tegiteu, egite balavati, mai egiteu ale pou la marokala te la isale Kraist. Oio vola egite ge koramulia ge ali la vavua la obu la mahulila, egite ge koramuli taia veia ge tiroro soilo te La Mautu Te La Uru. 15Egiteu ale ge pou ogala, egiteu la tahalo la vareagila, egite kama ge goilo, egiteu ale igo gegegeru, egiteu ale rasirasi, egiteu ale mata bulakalaka, egiteu ale bilibili, egiteu ale lotu tatavu la puigolo, egiteu tomi tai ale vagari tatavu la vulovulo la visigologolola.
16“Eau, e Iesus, eau bahati e angelo taku veia eia ge veia mutou la valalua me hatavivile la lotu taku la merera tomi alele. Eau te la hilile Devit, eau la matagaga ale uru mai e Toko ale reretala te la kavikoki.”
17La Kalulu La Marokala, egira me rutule Latu La Sip, mai egiteu ale te La Uru, egira veia maie mago “Gomai te La Uru!” Taritigi tai veia amutou ale ge lolo la merera alele, amuto tai ge vikara mai ele mago “Gomai te La Uru!” Mai isa peho la malehula, eia masagea mai ele veia ge liu, eia koramuli seselea veia eia ge goio te La Uru veia eia ge abi la vaabila ale La Uru eia sugu tarotia gatou, mai la lalu la mahulila.
La tapasi la merera
18Eau, e Ioanes, eau mera taro vagari sesele amutou tomi ale lolo la merera ale omai te la buk alele, eia veipala la papaga tomi ale ge sibitala mulimuli, eau mera taro amutou veia mai isa ge vagoilo lou la merera isahari loata ovola, La Tahalo Uru eia ge vilaia te la iligiligi tomi ale eia veipalea te la buk aleie. 19Mai tai isasa eia ge abi taro isahari la merera oilo vola, La Tahalo Uru eia ge abi taro leia la tabarila tetala te la vavua la obu la mahulila, veia eia kati ge pou tai te La Mautu La Marokala, mai la balavala tomi ale eia veipalea oilo te la buk aleie.20Eia ale veipalati la merera tomi ale, eia vikara maie mago “Eia sesele, eiau e Iesus, eau ge beu hari loua.” Ioge, eia taritigi pepeho veia eme ge gomai hari, Iesus, eme La Uru miteu. 21Taritigi tai veia la gilogo te Iesus, La Uru gatou, eia ge pou tamutou la valalua me hatavivile tetala. Amen.
Copyright information for
NAK